«ԸՆԾԱ»

«Մարդու որդին չեկավ ծառայություն ընդունելու, այլ ծառայելու» Մտթ. 20:28

ՍՈՑԻԱԼ - ՀՈԳԵՎՈՐ - ՀՈԳԵԲԱՆԱԿԱՆ ԿԵՆՏՐՈՆ

Քրիստոնեական ընկալման համաձայն մերձավորի հանդեպ սիրո, կարեկցանքի և գթասրտության զգացումներն են մարդուն դնում կատարելության ճիշտ ճանապարհի վրա և օգնում նմանվել Աստծուն։ Ըստ Ավետարանի մեր մերձավորը նա է, ով ունի մեր կարիքը, և նաև նա, ով անշահախնդիր հոգ է տանում մեր մասին (Ղուկ. 10։ 30-37):

Ահա այս գիտակցումից ոգեշնչված, Արցախի համար օրհասական ժամանակահատվածում, երբ Արցախը գտնվում էր լիարժեք շրջափակման մեջ և մաքառում էր իր գոյությունը պահել ամեն գնով, Արցախի թեմի առաջնորդ գերաշնորհ Տեր Վրթանես եպիսկոպոս Աբրահամյանի օրհնությամբ, մի խումբ քրիստոնյա արցախցիների նախաձեռնությամբ 2023թ. սեպտեմբերի 9-ին հիմնվեց «Ընծա» սոցիալ-հոգևոր–հոգեբանական կենտրոնը։ Մեր նպատակն էր կամավորական հիմունքներով՝ համագործակցությամբ սոցիալական պաշտպանության համակարգի այլ դերակատարների հետ համախմբել բոլոր նախանձախնդիր մարդկանց, ովքեր իրենց գաղափարներով, ֆինանսական, բարոյական աջակցությամբ կարող էին հոգալ նեղության մեջ գտնվող հայրենակիցների կարիքները:

Սակայն Արցախի շրջափակման արհավիրքն իր լրումին հասավ սեպտեմբերյան պատերազմով և նորանոր ավերածություններով, որն իր հերթին մեր համար ստեղծեց նոր մարտահրավերներ և բազում նոր խնդիրներ:

Արցախցիների բռնի տեղահանումից հետո կենտրոնի կամավորները ևս իրենց բազմաթիվ հայրենակիցների հետ միասին բնակություն հաստատեցին Հայաստանի Հանրապետությունում` շարունակելով իրենց ժամանակը, կարողություններն ու հնարավորություններն ընծայել ժողովրդի կորստի ցավը թեթևացնելու, ամոքելու, նրանց հոգեպես վերականգնման և զորացման գործին:

Կենտրոնն իր գործունեությունը հիմնականում իրագործում է ծրագրերով, որոնց մի մասը սեփական նախաձեռնությամբ, մի մասն էլ տարբեր հասարակական կառույց ների և այլ սոցիալական ոլորտի դերակատարների հետ համագործակցությամբ:

Դրանք առաջին հերթին ուղղված են խոցելի տարբեր խմբերի առաջնային կարիքների բավարարմանը` հոգեբանական, սոցիալական, հոգևոր, մշակութային ու կրթական ծրագրերի իրականացման միջոցով։

Բարեգործությունը սիրո դրսևորումն է կարիքավորի հանդեպ, քանզի ողորմածությունը դիտարկվում է որպես կատարյալ վարքի դրսևորում, կենսակերպ, որը հաճելի է Աստծուն և որի համար Աստված վարձահատույց է լինում:

«Քանի որ կարիքավորները անպակաս են լինելու երկրի վրա, դրա համար էլ այս բանը պատվիրելով՝ ասում եմ. «Քո աղքատ եղբոր (հայրենակցի) և քո երկրում տառապյալ մարդկանց նկատմամբ առատաձեռն եղիր»»:

Բ Օրենք 15:11

Կենտրոնի գործունեությունն կընդլայնվի և կօժանդակի ավելի շատ շահառուների, եթե մեր շարքերում ավելանան կամավորների թիվը: Կամավորագրվելու համար անցեք հետևյալ հղումով:

Կենտրոնի գործունեության ընթացքին կարող եք ծանոթանալ` անցնելով հետևյալ հղումով.