ՈՒխտի պատարագ Ս. Ստեփանոս Նախավկայի տոնին

Դեկտեմբերի 26-ին Հայ Եկեղեցին նշում է Սուրբ Ստեփանոս Նախավկայի հիշատակության օրը:

Տոնի առթիվ այսօր Ասկերանի շրջանի Խաչեն գյուղի Ս. Ստեփանոս եկեղեցում թեմակալ առաջնորդ գերաշնորհ Տեր Վրթանես եպիսկոպոս Աբրահամյանի հանդիսապետությամբ ուխտի պատարագ է մատուցել արժանապատիվ Տեր Հուսիկ քահանա Դոխոլյանը:

Սրբազան Հայրն իր շնորհավորհավորանքները բերեց Արցախի թեմում սպասավորող և Հայ Եկեղեցու ողջ սարկավագաց դասին:

Սուրբ Պատարագին իրենց մասնակցությունն էին բերել թեմի քահանայից և սարկավագաց դասերը: Արարողությանը ներկա էին Արցախի տարբեր բնակավայրերից եկած մեր հավատավոր ժողովուրդը, համայնքի կիրակնօրյա դպրոցի սաները, ինչպես նաև ք. Ստեփանակերտի Ս. Աստվածածին եկեղեցու երիտասարդաց միության անդամները:

Պատարագիչ Տեր Հայրն իր քարոզի խոսքում ներկայացրեց Ս. Ստեփանոս Նախավկայի անցած քրիստոսապաշտ ուղին, որից հետո շնորհավորեց ու իր բարեմաղթանքները բերեց ներկա գտնվող սարգավագներին:

Հավարտ Պատարագի կատարվեց հոգեհանգստյան կարգ՝ հանուն մեր Եկեղեցու և հայրենիքի համար նահատակվածների հոգու խաղաղության: