ՍԲ. ՀԱԿՈԲ ԵԿԵՂԵՑՈՒ ԾԽԱԿԱՆ ԽՈՐՀՐԴԻ ՀՈՐԴՈՐԸ

Սուրբ Հակոբ եկեղեցու ծխական խորհրդ

Ստեփանակերտի Սուրբ Հակոբ եկեղեցու ծխական խորհրդի կազմում ընդգրկված 12 անդամները 2021թ.-ից յուրաքանչյուր ամսվա հինգշաբթի օրը՝ երեկոյան ժամերգությունից հետո, որպես կանոն հավաքվում են և նախանշում անելիքները։ Մարտի 31-ին կայացավ ծխական խորհրդի հերթական ժողովը։ «Հայր մեր» տերունական աղոթքից հետո Տեր Մինաս քահանա Մովսիսյանի գլխավորությամբ Խորհրդի անդամները քննարկեցին եկեղեցու, համայնքային կյանքին վերաբերող և կազմակերպչական մի շարք հարցեր։

Ելնելով Արցախում ստեղծված բարդ ու ծանր իրավիճակից` Տեր Մինաս քահանա Մովսիսյանը անդրադարձավ եկեղեցու առաքելությանը, ներկայիս պայմաններում Խորհրդի անելիքներին։ Հանդիպման մասնակիցները փաստեցին, որ եկեղեցին պետք է համախմբի մարդկանց, փարատի բացասական տրամադրվածություններն ու ուղղորդի ճիշտ ճանապարհով։ Ատենապետ Արայիկ Խաչատրյանը ներկայացրեց հավատացյալների մտահոգությունները՝ կապված մեր երկրի բարդ իրավիճակի հետ, և խիստ կարևորեց աղոթքի ամենօրյա հերթապահությունները։ Առաջարկվեց ապրիլի 1-ից էլ սկսել երկրի անվտանգության և խաղաղության համար հերթապահության աղոթքները, և Տեր Մինաս քահանան հորդորեց բնակչությանը միանալ նախաձեռնությանն ու աղոթք, աղաչանք բարձրացնել առ Աստված։ Ինչպես արդեն հայտարարել է Հայ Առաքելական եկեղեցու Արցախի թեմը, Սբ. Զատկին նախորդող «Ավագ» շաբաթվա բոլոր օրերին, ապրիլի 11-16-ը ներառյալ՝ երեկոյան ժամը 19։00-ին, կկայանա միասնական աղոթք՝ արցախահայության անվտանգ, խաղաղ ու բարօր կյանքի համար, իսկ ապրիլի 2-ին՝ ժամը 17։00-ին, հանուն Արցախի խաղաղության Թեմը հրավիրում է ազգաբնակչությանը եկեղեցիներ՝ ապաշխարության և խաղաղության աղոթքի համար։

«Կոչ ենք անում մեր ազգաբնակչությանը լինել զգոն, աղոթել և հավատքով հաղթահարել այս դժվարին իրավիճակը, չընկճվել, չտկարանալ, չհուսահատվել, այլ մոտենալ Աստծուն ոչ միայն հավատով, այլ նաև կյանքով, գործով։ Այս իրավիճակը մեզ համար քննական շրջան է և մենք չպիտի տկարանանք, այլ հավատքի մեջ հաստատվենք, Աստծով զորանանք։ Աստված պահպանի և զորակցի բոլորիս»,-դիմեց Սբ. Հակոբ եկեղեցու հոգևոր հովիվը։