Լրացավ ձեռնադրության մեկ տարին
Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի օրհնությամբ և Արցախի թեմի առաջնորդ Տեր Վրթանես եպս. Աբրահամյանի ձեռամբ նախորդ տարի այս օրը՝ ապրիլի 25-ին, Գանձասարի վանքում տեղի ունեցավ Դադիվանքում սպասավորող Մանվել սրկ. Սարգսյանի քահանայական ձեռնադրությունը: Վերջինս ի պատիվ Դադիվանքի միջնադարյան նշանավոր վանահայր Աթանաս եպիսկոպոսի՝ ձեռնադրող Սրբազան Հոր կողմից անվանակոչվեց Տեր Աթանաս: Ազատագրումից ի վեր առաջին անգամ Արցախում տեղի ունեցավ կուսակրոն հոգևորականի ձեռնադրություն, որը մխիթարություն և մեծ ուրախություն էր ոչ միայն Արցախի թեմի, այլև համայն հայության համար:
Ձեռնադրությունից հետո Հայր Աթանասը տեղափոխվել է Դադիվանք, որտեղ քառասնօրյա պահեցողության շրջանն անցնելուց հետո մատուցել է իր անդրանիկ Սուրբ Պատարագը: Այնուհետև ձեռնադրող Սրբազան Հոր՝ Տեր Վրթանես եպս. Աբրահամյանի առաջնորդությամբ այցելել է Մայր Աթոռ Սուրբ Էջմիածին՝ ներկայացել Նորին Սրբությանը: Վեհափառ Հայրապետն իր գոհունակությունն է հայտնել Սրբազան Հորը և շնորհավորել նորաօծ աբեղային: Հաջորդող ամիսներին Հայր Աթանասն իր ծառայությունը շարունակել է Դադիվանքում: Սույն տարվա գարնանից Հայր Աթանասին և Դադիվանքի մյուս միաբաններին փոխարինել են այլ հոգևորականներ, որոնք շարունակում են ամեն օր վանքում աղոթքներ հնչեցնել և իրենց ներկայությամբ Դադիվանքը պահպանել իբրև հայկական սրբատեղի:
