Արցախի Թեմին Կից «Կիրակնօրյա դպրոց»

Ս.թ. դեկտեմբերի 4-ին, Ստեփանակերտի Աստվածամոր Սուրբ Հովանի Մայր տաճարում և Մարտակերտի Սուրբ Կարապետ եկեղեցում բացվեցին ՀԱԵ Արցախի թեմին կից՝ «Լույս մանկանց» ծրագրի շրջանակներում գործող կիրակնօրյա դպրոցները:

Կիրակնօրյա դպրոցները հոգևոր և գեղագիտական դաստիարակության կրթօջախներ են, որոնք գործելու են շաբաթը 1 օր 8-12 տարեկան երեխաների համար և նպաստելու են մատաղ սերնդի հոգևոր և հայեցի դաստիարակությանն ու մշակութային զարգացմանը: Ծրագրի առաջին փուլում ընդգրկվել են 60-ից ավելի երեխաներ։ Քանի որ մինչև դեկտեմբերի 24-ը հանրապետությունում կարանտին է հայտարարված, իսկ մեզ համար մեր երեխաների առողջությունը շատ թանկ է և չենք ուզում վտանգել այն, այդ իսկ պատճառով կիրակնօրյա դպրոցի դասընթացները կանոնավոր կերպով կմեկնարկեն գալիք տարվա հունվար ամսից։

Ծրագրի շրջանակներում երեխաները հնարավորություն կունենան

  • ստանալ տեսական գիտելիքներ Աստվածաշնչային ճշմարտությունների և Հայոց եկեղեցու դավանանքի ու սրբազան ավանդությունների մասին
  • ամրապնդել տեսական գիտելիքները գործնականում՝ ձեռքի աշխատանքների միջոցով։
  • Զարգացնել իրենց մտածողությունը
  • Ուսանել ազգային երգ ու պար
  • Հոգևոր երգեցողություն
  • Մասնակցել տարբեր ուխտագնացությունների

ԱՀ ԿԳՄՍ նախարար Լուսինե Ղարախանյանը ողջունել է կիրակնօրյա դպրոցների բացումը և նշել, որ մեր հայացքները դեպի Աստված ուղղելով միայն կարող ենք ունենալ ապագայի հիանալի տեսլական։