Արցախի թեմի առաջնորդի շնորհավորական խոսքը
Արցախի թեմի առաջնորդի շնորհավորական խոսքը Սրբոց Ղևոնդյանց քահանաների տոնի առիթով
Սիրելի՛ քահանա հայրեր և հայոց բանակի գնդերեցներ, սրտի անկեղծ ջերմությամբ շնորհավորում ենք Ձեզ Սրբոց Ղևոնդյանց քահանաների տոնի կապակցությամբ։
Ղևոնդ քահանան և իր զինակից հոգևորականները իրենց սխրանքով ու մահու չափ սիրով դարեր շարունակ նվիրումի օրինակ և ոգեշնչման աղբյուր են դարձել հայ հոգևորականության համար։
հատկանշական է, որ մեր եկեղեցին քահանաների տոնը կապել է զինվորական եկեղեցականների հիշատակի հետ։ Սա լավագույնս ցույց է տալիս, որ Հայոց Եկեղեցին միշտ էլ կանգնած է հայրենիքի պաշտպանության առաջնագծում։ Արցախյան վերջին պատերազմը նորից փաստեց, որ Ղևոնդյանց քահանաների դասը դեռ ապրում է ու գործում ի դեմս Մկրտիչ աբեղա Մկրտչյանի, Նարեկ սրկ. Պետրոսյանի, Ռուստամ սրկ. Պողոսյանի և պատերազմի մասնակից բազմաթիվ գնդերեցների ու քահանա հայրերի։
Սիրելի քահանա հայրեր, այսօր մեր երկիրը կարիքն ունի Ձեր նվիրյալ ու հերոսական ծառայության նաև խաղաղ պայմաններում։ Դուք պետք է մարդկանց սրտերին ու մտքերին հասցնեք Քրիստոսի լույսը և օգնեք բռնելու մեր ամենաանդավաճան դաշնակցի Աստծո ձեռքը։
Թող Ղևոնդյանց քահանաների օրինակը լինի Ձեզ համար ուժականության աղբյուր, իսկ նրանց բարեխոսությունը զորավիգ լինի Ձեր առաքելության ընթացքում։
Շնորհավոր Սրբոց Ղևոնդյանց քահանաների տոնը։
